Sikekke Sura' Kupabattu Rianakku

Anakku!
Iiami anne silawara' sura' battu riamma'nu niakamo dodong siagang lamma.
Sura' naukirika ilalang kasiri'-sirikang risiapang sallona annahang kata'baring-baringang. Amma' antaggalakai potolo'na nampa napadongko' rilebba'na nataggala', nasaba' je'ne' mata sierangngang pacce na-pa'risi pa'mai.

E, Anakku!
Rilebba sallonamo ajjappa awattua, kucini'-mako lompo sierang batang kale salewangang. Mingka iamma', nia' ha'na rikau, lanre-kammanami anjo nanu baca anne suraka; napunna tanu-ngaiya, kekke'mi rilebba'na nubaca, kammatong lebba'nu angkekke'-kekkeki atinna amma'nu.

E Anakku!
Ruampulo taung allalowa, iyami allo paling appakarannu ilalang tallasa'na amma'nu, rinakanana bidanga "nia'maki ilalang battang". Sikamma ammaka tantu napahangi anne kana-kanaya, riwattunna asse're pakkasia' rannu nate'ne pa'mai, ajjari uru-uru perjuangang siagang sikamma tappinrana batangkale nakasalewaa-nganga nalang-ngere'na iamma anne kabara appakarannua.

Nalanre kasannangngang pa'mai, kutianang-ngangko salapang bulang sallona. Ammenteng, attinro, ang-nganre siagang a'mai tasirapi', mannamo nakamma, tena nasu'ru' pang-ngaingku rikau, karannuangku antayangi kabattuannu. Bahkan pila' mae allo pila'-attambai pang-ngaingku. Kukimbolongko ribattang angngerang pakkasia' lamma sisambe lamma. Rannua mannaja napila' allo pila' attambai battala'nu, padahal tiananga sannaki battala'na kukasia.

Kammami anjo perjuangang lang-ngerang singara' kate'neang pa'mai rilebba allalona labbuna awattu-bang-ngia, tenaya nappatinro nappakasela' mata, amma angkasiaki battala'na tallasaka, malla, tabbaring-baring tenaya nakullei natulisi potolo siagang nasabbu lila.
Amma pissiapangamo nacini matea riruayya matanna, saggennu assulu abbattang dasere rilino. Je'ne-mata karru'nu sicampuru je'ne mata rannuna amma'nu napalelei sikamma kasessang sirurunga tanggala tanikulle napa'risi' tanientengang.

E, Anakku!
Allalomi attaung-taung umuru'nu, mingka batang-kalennu ti'ring niaki ripa'mai'na amma'nu, naje'ne'ko riruaya limanna, ririwanna ajjari pa'lungannu, barambanna ajjari kanrenu, bang-ngi tamattinro sollanna nung-ngappa ikau attinro. allimbangi wattu allowa amboyai kasannangannu, harapanna amma'nu, nia'nu nacini ta'muri. Paling lompo narannuanga allo-allo, iami antu nuppala' apa nakullea nappa'nia.

Kammami anjo allo bang-ngi nalaloi amma'nu sangkamma pelayanan rikau ,talebbako nabalang-parekang manna sinampe dudu. Sangkamma baine appasusu tamammari-mari, pajama tamalanre, saggennu lompo ajjari tau rungka.
Akkacinikammi kabalerannu. Rianjo wattua nasibu'mo amboyangko baine nukaerokia, saggenna narapi wattu pa'nikkannu. Kamma-tongi angkana ammantangi addumba barambanna sierangngang je'ne mata a'ruyung-ruyung nasaba rannui anciniko ammempo bunting, napacce nasaba la'lampako ambokoi.

Allalomi wattu-wattu kaminang battalaka, mingka kammatommako angkana teaimako ana'na, kamma na assenga risikammang. Ma'nassa tenamo nanujampangi iamma, angkaluppai ha'-ha'na, siapami sallonu tanacini, tanalang-ngere' sa'rannu. Tanu-jampangiami amma'nu sangkamma pelayang ang-ngurusu'ko risikammang.

E, Anakku!
Toama', abbukku'mi dongkokku, annenrengmi batang kalengku. A'rupa-rupami garringa kukasia anrosokia. Battala'mi kukasia ammentenga siagang ammempoa, lanremo nakamma naniai-ija pangngaingku rikau.
Kadde' nia kapang tau angpakalabbiri'ko barang siallo, tantu nupuji kabajikang pa'mai'na nuppala' tarima kasi'. Naamma'nu, ma'nassa tojengi gau' baji'na rikau, mingka tena-le'ba' nanusailei, nanu balasa kabajikanna. Lebbaka ajjari pelayang rikau ,anngurusu'ko attaung-taung.
Kemae pa'balasa'nu siratanga nupa'nia? Kammaka anjo terasa'na atinnu…? Ia'areka tenamo nuta'rapi ammangei nalanre kasibukannu…?

E, Anakku!
Iamma, attambai rannuna, te'ne pa'mai'na punna nacini'ko sannang, nasaba ikau bulaeng ti'no'na, Apa kodong salangku nunia ammusuia'..!, tanungaiaka' nucini' nubattala' ambattuia'..?Apakah le'baka aggau'-sala rikau, ia'areka tena nupuas ribateku amparutusu'ko?

Pajjaari iamma' pelayangnu sangkamma pelayang nusarea gaji. Pasolongi siatti pangngainnu. U'rangi pammajikingku manna sikedde dudu'ja, nuppanggaukang gau' baji', nasaba' sitojeng-tojenna Alla Ta'ala nangai tuggau' bajika.

E, Anakku!
Kupala'-palaki nikkulleija sipa'ru-rua. Tena kuero ipantaranganna anjo. Passamma anciniki ballisi'na rupannu siagang allang-ngereki allo-allo-nassu na larronu.

E, Anakku!
Pammolikanga sike'de tampa' riatinnu, poro aggau' baji rise'rea tau toa baine, nikalilingia nakku' nakapa'risang nyawa. Ampa'jariai kanre pa'risi atia siagang salimu kakodiang pa'maika. Nupaattiki je'ne' matanna. Nupa'risi atinna nanukaluppai kabajikanna.
Tena kuero' ajjamma' ripacce napa'risi pa'mai kukasiaka rikalompoanNa Alla Ta'ala. Nasaba' punna kupabattui anne parakaraaya irateanna langika, mallaka sallang natattabaiko pabbalasa' takurannuang, najjari pangngalarroi ribone balla'nu, lanre kadorakannu ritau toa. Ku'u'rangi pappasanna Nabbita rinakanana risahaba'na:

ألا أنبئكم بأكبر الكبائر؟قالوا بلى يا رسول الله :قال " الإشراك بالله وعقوق الوالدين" رواه البخاري

"Apakah ero'ko kupauang dosa kaminang lompoa?" (naulangi nabbita pintallung), nanakanamo sahabaka, "ie ya, Rasulullah," Nakanamo Nabbiita: "Iami antu appa'ruaya ri Allah Taala, nadorakaya ritau toaya ."
Nakana podeng rihaddisina maraenga :

لا يدخل الجنة عاق
"tena nantama risuruga tau dorakaya ritau toana"

ملعون من عق والديه
"bellai ripangngamaseanna Alla Ta'ala tau dorakaya ritau toana"

Mingka teaja'…, tena nakurannuangi akkajariyang kammaya anjo rikau, nasaba' ti'rin nia' ijako ta'ukiri riatingku, bulaeng tallasa'ku.

E, anakku, u'rangi baajiki!
Appakarammulami akkacinikang toaya rirupannu, uuanga riulunnu. Allalomi taung sisambe taung, ikau lajjaariko tau toa, nasikamma panggaukanga tojeng nia' sallang taba-ribokona, Lannulisikko sallang sura' risikamma ana'-ana'nu sierangngang je'ne' mata kammatong apa natulisika amma'nu. U'rangi, risesena Alla Ta'ala massing lasibuntuluki sallang sikamma tau sisalayya.
E anakku, malla' laloko ri Alla Ta'ala napassaba'ki amma'nu, lu'luki je'ne' matanna, siagang pakarannui atinna, nalo'loso' pa'risi nyawana. Ritenanapa nanibattui ripammuntulinna Alla Taala, na nampa nusassala' kalennu.

Kekke'mi anne suraka punna lebba'mo nubaca, mingka issengi, inai-nai tau aggau baji', kabajikanna untuk kalenna tonji, na inai-nai tau aggau' sala, pasti nanaciniki sallang pabbalasa'na.

Kammami anne sura' ang-ngukirikai pakkasia pacce ri nyawaku, pammopporangi iamma punna nia kasalanna urikau .

Amma'nu, nakkuka na pacce- pa'mai.

[Oleh : Abu Uways , Alumni Takmili 2001]